Onlayn Azərbaycan

Ölkənin ən ucqar yaşayış nöqtələrində də əhali və təşkilatlar üçün yüksəksürətli internetə çıxış, həmçinin istifadəni asanlaşdıran innovativ həllər təqdim edərək insanların rifahını yaxşılaşdırmaq məqsədilə “Onlayn Azərbaycan” layihəsi həyata keçirilir.

Dövlət-özəl tərəfdaşlıq modelinə əsaslanan layihənin icraçıları “Aztelekom” MMC, “Bakı Telefon Rabitəsi” MMC, “Azeronline LTD”, “Smart Systems Tecnology” və “MegaLink” şirkətləridir.

GPON (Gigabit Passive Optical Networks) texnologiyası ilə müasir genişzolaqlı həll yolları əsasında aparılan işlər 2017-ci ildə başladılsa da, 2021-ci ildən etibarən, regionlar daxil olmaqla, geniş miqyasda həyata keçirilir.

“Onlayn Azərbaycan” layihəsi müddətində mövcud ADSL avadanlığının müasir IMS platforması ilə işləyən GPON avadanlıqla əvəz edilməsi, köhnə mis magistral kabel infrastrukturunun optik kabellərlə əvəzlənməsi və optik paylayıcı şəbəkənin qurulması həyata keçirilir.

Bu texnologiya internet xidmətinin keyfiyyətini əhəmiyyətli dərəcədə yaxşılaşdırır, eləcə də IPTV və digər əlavə xidmətlər göstərməyə imkan yaradır. Optik kabel texnologiyasının son trendi hesab edilən GPON texnologiyası texniki olaraq, 1 gigabit/s-dək sürətli internetin təmin edilməsi üçün imkan yaradır. Bu optik texnologiya təbii deformasiyaya dözümlüdür və məlumatı (siqnalı) ən sürətli şəkildə ünvana çatdırır.

Layihə çərçivəsində 2024-cü ilin sonunadək ölkə ərazisində bütün ev təsərrüfatı və biznes subyektlərinin sözügedən GPON və digər genişzolaqlı texnologiyalar vasitəsilə genişzolaqlı internetlə təmin edilməsi, yüksəksürətli internetdən istifadənin genişləndirilməsi və sabit genişzolaqlı internet abunəçilərinin faizinin artırılması planlaşdırılır.