İnnovasiya və Rəqəmsal İnkişaf Agentliyi ilə ABB İnnovasiya Mərkəzi növbəti əməkdaşlığa start verir

“Technest” təhsil proqramı çərçivəsində 3-cü ABB Hakatonuna qeydiyyat başlayıb.

İnnovasiya və Rəqəmsal İnkişaf Agentliyi və ABB İnnovasiya Mərkəzinin tərəfdaşlığı çərçivəsində informasiya texnologiyaları üzrə milli kadrların yetişdirilməsinin sürətləndirilməsi məqsədilə 3-cü ABB Hakatonuna qeydiyyata start verilib. Sözügedən hakaton İnnovasiya və Rəqəmsal İnkişaf Agentliyinin 2021-ci ildən etibarən həyata keçirməkdə olduğu “Technest” təhsil proqramı və ABB İnnovasiya Mərkəzinin “Startapların İnkişaf etdirilməsi Proqramı” çərçivəsində icra olunacaq.

3-cü ABB Hakatonunun əsas istiqamətləri rəqəmsal bankçılıq, nağdsız ödəniş infrastrukturunun inkişafı, köçürmələrin optimallaşdırılması və “ƏDV geri al” xidmətinin inteqrasiyasını əhatə edir. Rəqəmsal biznes sahəsində innovativ həllərə maraq göstərən hər kəs sözügedən Hakatonda iştirak edə bilər. Beynəlxalq təcrübəyə malik yerli ekspert və mentorların dəstəyi ilə iştirakçı komandalar biznes ideyalarını daha da inkişaf etdirə biləcəklər. Rəqəmsal innovasiya konsepsiyasına və pre-inkubasiya hədəflərinə uyğun gələn ən yaxşı layihələr isə ABB İnnovasiya Mərkəzinin İnkubasiya proqramına qəbul olunacaq. Həmçinin hakatonun qalib komandaları üçün mükafat fondu təsis edilib. Mükafat fondu inkubasiya dövründə startap komandalarına yatırım olaraq təqdim ediləcək. Hakatonun şərtlərinə əsasən 1-ci yer üzrə 5 min, 2-ci yer üzrə 3 min, 3-cü yer üzrə isə 2 min manat məbləğində mükafat fondu müəyyən edilib. Hakatonda iştirak üçün müraciət etmək istəyənlər bu link – https://abbinnovation.az/az/apply vasitəsilə qeydiyyatdan keçə bilərlər. Son müraciət tarixi 06 iyul 2022-ci ildir.

Qeyd edək ki, “Technest” təhsil proqramı Rəqəmsal İnkişaf və Nəqliyyat Nazirliyinin təşəbbüsü ilə 2021-ci ildən start götürüb. Proqramın məqsədi informasiya texnologiyaları üzrə milli kadrların yetişdirilməsini sürətləndirmək və bu sahədə mövcud çatışmazlıqları aradan qaldırmaq və ölkədə rəqəmsal inkişafa töhfə verməkdir. Rəqəmsal İnkişaf və Nəqliyyat Nazirliyi bu istiqamətdə dövlət-özəl tərəfdaşlığı əsasında “Whelp” startapı ilə birgə təsis etdiyi “Code and More” təhsil layihəsi və nazirliyin “İKT Lab” Tətbiq və Tədris Mərkəzi ilə yanaşı, ölkədə İKT üzrə peşəkar kurslar təşkil edən “Code Academy”, İsrail – Azərbaycan Təlim Mərkəzi, “Tech Academy”, “ABB Tech” Akademiyası və İnnovasiyalar Mərkəzi ilə yaxından əməkdaşlıq edir.

“Technest” çərçivəsində hazırda 120 məktəbli, 618 tələbə və məzun bulud həlləri, bulud inzibatçılığı, böyük verilənlər bazası, kibertəhlükəsizlik, avtomatika, elektronika, müxtəlif proqramlaşdırma dilləri, “UX/UI” dizayn kimi müxtəlif istiqamətlər üzrə təhsil alır.