Yeni nəsil mobil rabitə şəbəkələrinin tətbiqi ilə bağlı seminar keçirilir

Bu gün Azərbaycan Respublikasının Rəqəmsal İnkişaf və Nəqliyyat Nazirliyinin və Beynəlxalq Telekommunikasiya İttifaqının birgə təşkilatçılığı ilə Bakı şəhərində “Yeni nəsil (İMT2020/5G) mobil rabitə şəbəkələrinin tətbiqi” adlı seminar işə başlayıb.

Seminarda İKT sahəsində texnoloji trendlər, o cümlədən 5G texnologiyası və onun imkanları, tətbiq strategiyaları və biznes modelləri, tezlik spektrinin ayrılması, infrastrukturdan birgə istifadə, mövcud şəbəkələrin rasionallaşdırılması və digər aidiyyəti məsələlər müzakirə olunur. Həmçinin müxtəlif ölkələrin 5G texnologiyasına keçidi üzrə mövcud təcrübənin müzakirəsi aparılır.

Tədbirdə Beynəlxalq Telekommunikasiya İttifaqının, GSMA və bu sahədə fəaliyyət göstərən digər beynəlxalq təşkilatların mütəxəssisləri tərəfindən məruzələr edilir.

Seminarda Rəqəmsal İnkişaf və Nəqliyyat Nazirliyi və tabeli qurumları ilə yanaşı, müxtəlif dövlət qurumlarının və rabitə operatorlarının mütəxəssisləri iştirak edirlər.

Seminar noyabrın 3-nə qədər davam edəcək.