Nazir Rəşad Nəbiyev UNESCAP-ın Nəqliyyat üzrə 4-cü Nazirlər Konfransında video formatda çıxış edib

Cari ilin 14 dekabr tarixində BMT-nin qərargahı Tailandın Banqkok şəhərində yerləşən Asiya və Sakit Okean üçün İqtisadi və Sosial Komissiyasının (ESCAP) Nəqliyyat üzrə 4-cü Nazirlər Konfransı hibrid formatda öz işinə başlayıb.

İclasda əksər üzv ölkələrin nümayəndələri, eləcə də ESCAP katibliyinin və digər beynəlxalq təşkilat və qurumların rəsmiləri iştirak edirlər.

Sessiyanın 16 dekabr tarixində keçirilən nazirlərin çıxışı seqmentində rəqəmsal inkişaf və nəqliyyat naziri Rəşad Nəbiyevin video formatda çıxışı təqdim olunub.

Çıxışda ölkəmizdə BMT-nin Dayanıqlı inkişaf üzrə gündəliyinin icrası, eləcə də respublikamızın nəqliyyat sahəsində həyata keçirdiyi və təşəbbüskarı olduğu beynəlxalq əhəmiyyətli layihələr, bu sahədə görülən işlər və əldə olunan nailiyyətlər barədə tədbir iştirakçılarına ətraflı məlumat verilib.