Beynəlxalq “İKT-də qızlar” günü ölkəmizdə geniş qeyd olunub
Bütün dünya ictimaiyyəti aprelin sonuncu həftəsinin dördüncü günü “İKT-də qızlar” günü kimi qeyd edir. “İKT-də qızlar” günü Birləşmiş Millətlər Təşkilatının (BMT) İKT sahəsində ixtisaslaşdırılmış qurumu olan Beynəlxalq Telekommunikasiya İttifaqı (BTİ) tərəfindən təsis edilib.
“Üfüqləri genişləndirək, yanaşmaları dəyişək” mövzusu ilə keçirilən bu beynəlxalq gün ənənəvi olaraq ölkəmizdə də geniş qeyd olunur.
Nəqliyyat, Rabitə və Yüksək Texnologiyalar Nazirliyi qadınların İKT sahəsində rolunun artırılmasına dəstək vermək məqsədilə bu gün bir sıra tədbirlər keçirib.
Sözügedən tədbirlər çərçivəsində 26 aprel 2018-ci il tarixində Nəqliyyat, Rabitə və Yüksək Texnologiyalar Nazirliyinin Elektron Hökumət Təlim-Tədris Mərkəzində və videokonfrans əlaqəsi vasitəsilə regionlardakı (Şamaxı, Gəncə, Mingəçevir, Lənkəran, Bərdə və Qəbələ) təlim-tədris mərkəzləri ilə birgə tədbir təşkil olunub.
Bakı və adıçəkilən regionlardakı təlim-tədris mərkəzlərində yuxarı sinifdə təhsil alan qız şagirdləri və informatika müəllimələri dinləyici kimi videokonfrans əlaqəsi ilə konfransa qoşulub.
Tədbirdə Nəqliyyat, Rabitə və Yüksək Texnologiyalar, Təhsil, Mədəniyyət nazirliklərinin, “Yüksək Texnologiyalar Parkı” MMC-nin, Məlumat Hesablama Mərkəzinin, “Femmes Digitales” və “WoWoman” qadın klublarının, “ABAD” publik hüquqi şəxsin, “Qadınların İnkişafına və Maarifləndirilməsinə dəstək” İctimai Birliyinin nümayəndələri çıxış ediblər.
Bildirilib ki, bu əlamətdar hadisə ilə əlaqədar dünyada məktəblər, gənclər qrupu, vətəndaş təşkilatları və dövlət qurumları tərəfindən təşkil edilən müvafiq tədbirlər keçirilir. Son illərdə “İKT-də qızlar” günü çərçivəsində həyata keçirilən tədbirlərin miqyası xeyli genişlənərək birgünlük tədbir formatından qızları il ərzində İKT ilə işləməyə öyrətmək üçün nəzərdə tutulmuş daimi fəaliyyət göstərən proqramlara çevrilib.
Qeyd edilib ki, İKT gender bərabərliyi, qadınların hüquq və imkanlarının genişləndirilməsinin təmin edilməsində əsas amillərdən biridir. Bu texnologiyalardan istifadə imkanına malik olan qız və qadınlar yeni iş yerlərinin yaradılması və sahibkarlıq fəaliyyətinin inkişafı kimi imkanlardan da asanlıqla istifadə edə bilərlər.
Eyni zamanda, bu gün “Yüksək Texnologiyalar Parkı” MMC-də Azərbaycan Dövlət Neft Sənayesi Universiteti, Bakı Mühəndislik Universiteti, Azərbaycan Texniki Universitetinin informasiya texnologiyaları ixtisası üzrə təhsil alan qız tələbələri üçün startapçı xanımların təqdimatında seminar təşkil olunub.
Nəqliyyat, Rabitə və Yüksək Texnologiyalar, Təhsil, Mədəniyyət nazirliklərinin, “Yüksək Texnologiyalar Parkı”nın nümayəndələri çıxış edərək bildiriblər ki, “İKT-də qızlar” günü qadınların informasiya-kommunikasiya texnologiyaları (İKT) sahəsindəki fəaliyyətinin vacibliyini vurğulayır, qızları və gənc qadınları texnologiyalar sahəsində peşə seçimi etməyə stimullaşdırır.
Bildirilib ki, “İKT-də qızlar” günü qızları elm, texnologiya, texnika və riyaziyyat sahəsində təhsil almağa stimullaşdırmaq yolu ilə “rəqəmli fərqlik”in aradan qaldırılmasına kömək etmək üçün nəzərdə tutulmuş qlobal təşəbbüsdür.
"Oyunların yaradılması və satışı", "Dünyanın onlayn bazarına necə qoşulmaq olar?”, "BIG Data analizlərində qadınlar" mövzuları üzrə ölkəmizdə uğurlu startapların qadın təmsilçiləri Mia Əliyeva, Mirvari Mehdiyeva və Nigar Qasımova öz təcrübələrini tədbir iştirakçıları ilə bölüşüblər.
