Maliyyə xidmətlərinin inkişafı layihəsi

İlk olaraq qeyd edək ki, 2015-ci ilə qədər Mərkəzi Bank tərəfindən 63 rayon Poçt Filialına və 1104 poçt şöbəsinə bank-maliyyə xidmətlərinin göstərilməsi üçün müvafiq lisenziya verilib.

 

2015-ci ildə “AKİS”-də respublika üzrə 2 495 722 ədəd pul köçürülməsi qəbul edilib, 2 406 197 ədəd isə ödənilib.

 

“Azərpoçt” MMC-nin ödəniş kartı sahibi olan müştərilərinin internetdə daha təhlükəsiz əməliyyatlar aparması üçün “3D secure code” layihəsi və “Mobil bankçılıq” (CIB) xidməti istifadəyə verilib, “İdeal kredit” və “Azərpoçt” MMC arasında ikitərəfli müqavilə imzalanıb. Müqaviləyə əsasən, “Millikart” şəbəkəsi daxilində nağd və qeyri-nağd əməliyyatlara görə, eləcə də ödəmələrin qəbuluna görə xidmət haqqının “Azərpoçt” MMC-yə ödənilməsi həyata keçirilib.

 

I Avropa oyunları zamanı Bakıda Atletlər və Media kəndində, o cümlədən Mingəçevirdə Atletlər və Media kəndində poçt-maliyyə xidmətləri göstərilməsi üçün səyyar poçt şöbələri açılıb.

 

“Azərpoçt” MMC 2015-ci il ərzində Ümumvətəndaş (xarici) pasportunun alınması zamanı rüsumların yerində ödənilməsi üçün Azərbaycan Respublikası Daxili İşlər Nazirliyinin Vizalar və qeydiyyat şöbəsi ilə əməkdaşlıq edib.

 

“Maliyyə xidmətlərinin inkişafı” layihəsi üzrə “Azərpoçt” MMC-nin 1132 poçt şöbəsinin mərkəzi serverə qoşulması məqsədilə zəruri texniki tədbirlər görülüb, 80 ədəd kənd poçt şöbəsinin “Azercell 3G” texnologiyası ilə, 350 ədəd kənd poçt şöbəsinin isə “Aztelekom” İB-nin xDSL şəbəkəsi üzərindən 1Mbps sürəti ilə (data xidmətinin ötürülməsi) serverə qoşulması təmin olunub. Digər PŞ-lərin “Azərpoçt” MMC-nin kompüter şəbəkəsinə çıxışı “Azdatacom” şəbəkəsi vasitəsilə təmin edilib.

 

“Maliyyə xidmətlərinin inkişafı” layihəsi çərçivəsində Şirvan Poçt Filialının Müştəri Xidmətləri Mərkəzi tamamilə yenidən qurularaq istifadəyə verilib. Layihənin davamı olaraq 10 “ASAN” səyyar avtobusunun “Azərpoçt” MMC-nin şəbəkəsinə qoşulması təmin edilib. Poçt şöbələrində xidmətin yüksək səviyyədə təşkil olunması məqsədilə 50 ədəd POS-terminal, 7 ədəd ATM avadanlığı, həmçinin 5 ədəd ödəmə terminalı, 5 ədəd “Exchange” terminalı avadanlığı alınıb.

 

“İnvestAZ” şirkəti ilə birgə beynəlxalq “co-brand” kartların emissiyası həyata keçirilib. İnternet bankçılıq xidməti müştərilərin istifadəsinə verilib. Regionlarda, xüsusilə kəndlərdə müştərilərə şöbəyə gəlmədən yerindəcə operativ şəkildə ödəniş xidmətlərinın təşkili üçün 253 ədəd səyyar “SmartPay” terminalı proqramlaşdırılaraq filiallara təhvil verilib.

 

“Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” Prezident İlham Əliyevin 28 fevral 2019-cu il tarixli Fərmanı üzrə Bank Olmayan Kredit Təşkilatları və bağlanan bankların müştərilərinə “Azərpoçt” MMC tərəfindən ümumilikdə 62 milyon 940 min 280 manat 11 qəpik kompensasiya məbləği ödənilib. Maliyyə Bazarlarına Nəzarət Palatası tərəfindən təqdim olunan siyahıya əsasən, “Azərpoçt” MMC-nin icra etdiyi əməliyyat 121 minə yaxın vətəndaşa şamil olunub.

 

“COVID-19” virusunun Azərbaycan ərazisində yarada biləcəyi təhlükənin qarşısının alınması məqsədilə 2020-ci ilin əvvəlindən etibarən ölkə ərazisində tətbiq edilən xüsusi karantin rejimi zamanı işsiz qalan və işini itirən aztəminatlı şəxslər üçün birdəfəlik ödəmənin (190 manat) verilməsi prosesi “Azərpoçt” MMC-nin poçt şöbələrində həyata keçirilib. Layihə üzrə 590 mindən artıq vətəndaşa “Azərpoçt” MMC tərəfindən ödəniş olunub.

 

“Azərpoçt” MMC xüsusi karantin rejimində bir sıra sosial layihələrin icrasına da dəstək verir. Korporativ sosial məsuliyyət strategiyasına uyğun olaraq, həmçinin fermerlərə qayğı göstərmək məqsədilə qapalı məkanlarda insanların kütləvi toplaşmasının qarşısını almaq üçün “Azərpoçt” MMC-nin 53 poçt filialı üzrə 203 010 ədəd “fermer-kart” ünvanlara çatdırılıb.

 

Pandemiya ilə əlaqədar ölkədə elan edilmiş karantin rejimi müddətində “Azərpoçt” MMC-nin poçt şöbələri şənbə, bazar və bayram günləri də daxil olmaqla hər gün vətəndaşlara poçt-maliyyə xidməti göstərib. Bu müddət ərzində “Azərpoçt” MMC-yə məxsus ATM və POS-terminallarda digər banklara məxsus ödəniş kartları vasitəsilə 10 417 957 manat nağdlaşdırma əməliyyatı həyata keçirilib.

 

Ölkədə, xüsusilə ucqar ərazilərdə fəaliyyət göstərən özəl sektorun, eləcə də əhalinin elektron maliyyə xidmətlərindən istifadəsini genişləndirmək məqsədilə 2020-ci ildə “Azərpoçt” MMC Dünya Bankı Qrupunun üzvü olan IFC (Beynəlxalq Maliyyə Korporasiyası) ilə tərəfdaşlığa başlayıb. Layihəyə əsasən, elektron maliyyə əməliyyatlarını icra etməyə imkan verən elektron pul kisəsinin hazırlanmasında IFC “Azərpoçt”la birgə çalışacaq. İsveçrənin İqtisadi Məsələlər üzrə Dövlət Katibliyi (SECO) ilə tərəfdaşlıq əsasında həyata keçirilən “Elektron və rəqəmsal maliyyə xidmətləri” layihəsi (IFC), xüsusilə kənd yerlərində, bank filiallarından uzaqda yaşayan əhaliyə və kiçik sahibkarlara banka gəlmədən ödənişlər etməyə və bank xidmətlərinə rəqəmsal çıxış əldə etmək imkanı verəcək.

 

“Azərpoçt” MMC Azərbaycan Mərkəzi Bankının (AMB) “Maliyyə məhsul və xidmətlərinin məlumat-axtarış sistemi”nə qoşulub və sistemin (infobank.az) tərkibində “Filial və şöbələr”, “Bankomatlar”, “Ödəniş terminalları”, “Ödəniş kartları” bölmələrində “Azərpoçt” MMC-nin müvafiq məlumatları yer alıb.

 

 “Azərpoçt” MMC “UPT” pulköçürmələri sisteminin Azərbaycanda yeni tərəfdaşı olub. “Ödəniş transferi sistemi üzrə əməkdaşlıq” müqaviləsinə əsasən, “Azərpoçt” MMC və Türkiyə Dövlət Poçt və Teleqraf Təşkilatı daha sərfəli tariflərlə xidmət göstərməyə başlayıb. Müqavilə çərçivəsində “Azərpoçt” MMC və PTT, “Aktif Bank” tərəfindən təqdim olunan “Ödəniş ötürmə sistemi”ndən istifadə etmək barədə razılığa gəlib. 2021-ci ilin aprel ayından etibarən vətəndaşlar hesab açmadan “Azərpoçt”un 1500-ə, PTT-nin isə 5000-ə yaxın poçt məntəqəsində daha aşağı tariflərlə etibarlı pulköçürmə əməliyyatını həyata keçirə bilirlər.

    Şriftin ölçüsü

    A A A

    Saytın rəngi

    R R R